Us Melkbank

De Helmut-Hilmer-Melkbank in Otter

Auf Hochdeutsch lesen →

Morgens stunnen de vullen Melkkannen op de Bank, un middags keemen se leddig wedder. An Sommeravenden drapen sik dor de jungen Lüüd ut’n Dörp. So höör de Melkbank fröher to’n Alldag in Otter. De Piepenclub Otter vun 1919 hett so’n Bank nobuut un midden in’t Dörp opstellt. Se erinnert dor an, wo dat fröher in Otter togüng.

Gruppenbild bi de Helmut-Hilmer-Melkbank in Otter. Op de Holtbank steiht en Melkkanne mit dat Wapen vun’n Piepenclub.
Melkbank-Treffen 2026 bi de Helmut-Hilmer-Melkbank in Otter (Foto Tyra Welzin)

As dat Melkauto noch dörch’t Dörp föhr

De Melkbank weer ut dicke Holtbalken timmert. Se weer twee bet dree Meter lang un üm un bi een Meter breed. Jeden Morgen stellten de Buern ehr vullen Melkkannen op de Bank. Wenn dat Melkauto keem, trock de Fohrer de Kannen glieks op de Pritsch un broch se na de Molkeree. Middags stunnen de leddigen Kannen wedder op de Bank, un de Buern kunnen se mitnehmen.

An de Melkbank drapen sik Jung un Oolt. Dor bleef man to’n Klönen stahn, vertell sik, wat dat Ne’es geev, oder verafreed sik. An Sommeravenden keemen de Jungs ut’n Dörp dor tosamen. Un wokeen weet, villicht is dor ok de een oder anner gode Idee för’n Piepenclub opkamen, de later bi en Maandsversammeln to Spraak keem.

Wo de Melkbank wedder na Otter keem

As dat Programm för de Dörpserneuerung (1986–2015) to Enn güng, stell de Piepenclub de nobuute Bank in’n Oktober 2015 op. Helmut Hilmer hett de Bank timmert, un Jürgen Albers hett de Melkkanne dortogeven. An’n 9. Juni 2016 hett de Piepenclub de Bank bi sien Maandsversammeln offiziell inweiht.

Mit de Melkbank hollt de Piepenclub de olen Sitten un Brüük in Ehren. Dat stünn al as Zweck in sien eerste Satzung.

En Naam to’n Gedenken an Helmut Hilmer

An’n 12. Juli 2025 kreeg de Bank to’n Gedenken an ehrn Erbuer den Naam Helmut-Hilmer-Melkbank. Wenn de Piepenclub in’n Juli to’n Melkbank-Treffen inlett, kaamt dor wedder Lüüd tosamen un klöönd mit’nanner, jüst as fröher.

Na den Bericht vun’n Vörstand vun’n 9. Juni 2016 mit’n Nadrag över de Naamgeving in’n Juli 2025.